這個景蓋隋，哇、這呢隋安呢，老總統蔣中正帶一陣兵這呢大陣安呢，循這個溝一直行，行落來，呀兵歸趟安呢，大家安呢嘰嘰喳喳，大家都安呢綴仔真好，服裝這呢仔整齊安呢。老總統蔣中正家己一個帶兵一直行，安呢到你這個所在。

    到你這個所在的時拵，拄好你佇邊仔佮伊看，一陣人、佮伊看，佮伊看來到河邊遐，大家攏圍佇嘿河邊行，大家行呀疼疼疼、正經疼，老蔣的宛若徛佇迄個所在安呢。呀迄陣兵哟，專嘿志願兵，專一括志願的兵哟！

    就是咧表示：卡早的時拵，上早哦，伊唯中國大陸來迄個時拵，這陣兵的時拵歸隊攏跟隨伊，跟隨蓋死忠。你看攏一括志願的，逐位來、五方來，五方來，啊差不多、差不多五成至七成，差不多攏有得這鼻孔的毛病。因為長期的涉水啊！長期的涉水，長期的行，長期的踏行、踏行，攏是安呢有這毛病。啊這個毛病，大部分攏是生活卡無正常，盤山盤嶺來到嘿所在隱居，到嘿所在時，佇迄所在攏勿當過安呢！

    迄個所在，就是代表你過去世的時拵，拄好迄個時拄好佇遐塊閉關，所擺講嘿所在攏勿使出出入入，攏勿使出去。到遐的時拵就等於勿當出來，嘿是真險惡、真險惡的所在，到迄個所在的時，攏勿當走安呢。

    呀老蔣的來佮你招呼講話，伊挌咧問：蔣經國呢？蔣經國若嘸看見！哦、足久無看這個蔣經國安呢！但是迄拵伊佮伊脫離啊，已經脫離已成另外一支軍了，另外一支軍無同位，已經無同位。呀伊嘛塊想辦法欲來救恁這支軍，想辦法欲來救恁這支軍，所擺伊已經佇別位咧傳囉！

    拄好一括人來到遐拄好揣著你，結果拄好踏入這所在，這所在是勿使離開的。既然入來到遮，恁就愛歸隊踮遮，無管你蔣中正啥人攏同款，攏愛踮這所在，無論是啥物人攏同款。這個所在就是會當入、勿當出，完全攏佇這個所在，踮遮好好仔修，好好仔修，後日有機會則會當出去。

    受困在這個景，在這個景就是在這個臺灣受困。因何這美麗的景顯示呢？就是顯景欲來指示這個物件。在這個當年伊來這個所在，這是一個劫數，一個劫數，無論伊老蔣中正的時，佇大陸安呢叱吒風雲赫呢種種風雲，伊種種的時做呀赫呢大，南征北討，世界攏真有名，到尾仔伊亦是終其愛落難到這個臺灣，到你這個閉關的所在，來守在台灣這個所在，來守一世人、來遮過往身亡。

    這就是一個天劫，一個劫數、劫數，這劫數的時，無論你人偌厲害偌厲害，啥物時拵攏難逃這個劫數，難逃這個劫運。因何伊這個物件會歸陣人，安呢亦有少年的亦有老的，有未結婚的啥的攏總有，形形色色。啊大家來報告攏愛講好話，攏講好話，勿使講孬話，這就是虛偽，完全虛偽，攏總是好的代誌，攏呣是孬的代誌。

    這落物件的時，就是顯影講：在這個人的時拵，這個劫運，當這個劫運若到的時拵，無論你偌大，能力偌大偌偉大時，攏是愛受這個劫的影響。除非你修呀真好，修到真好，修到跳出三界外、不在五行中，到遐的時拵，你則有法度，有法度脫這個困。無！一般是無法度脫困，無法度脫困。

    一般的人順命運、行命單、走命狀。這名單這啥物人啥物人、個人的命單攏有。名單就是佮你講，該你落來的時拵，已經佮你註定，你連走都走無路，連走就走無路。按照命運行就是安呢，按照命運行就是安呢！該佗位守，該佗位行，該走佗位，該定居在這個所在啥伙時，攏有一個運啦，攏有一個運。

    所擺，世間的時拵，上好就是講，會當避逃這個劫運的人，會使講這個修行者，高深的修行者則有法度脫離這個世間的這種的因果。這愛高深的修行者則有法度，一般的修行者亦無法度啦！一般的修行者無可能倘好脫過，伊只有是虛偽的穿袈裟，虛偽的呷素食，虛偽的言語，是修道人安呢爾爾，伊無法度，愛真高深真高深者。

    今日這個景互恁的時拵，這個顯景就是講愛互恁知影，知影這個社會中，做代誌形形色色哟，該當順其命來順其行，愛互伊順其行，順其行。

    該當你知影伊的物件的來龍去脈了後時，大約你佮伊講一下，點一下，點一下了後時，免佮伊強講你愛怎樣創、怎樣啥。來龍去脈知影的時，你佮伊講一下、點一下，點一下了後時，伊該當安呢行，亦是喬伊的路互伊家己去行，比較卡自然哦！

    比如講，你若佮伊點了相清楚，佮化了相清楚，互伊行時顛倒歹行，歹行對伊來講並無好處，對伊來講無好。有的人，亦是愛順照伊的命運塊行卡順事。

    呀你是講，人明明會當行卡好的，啊伊都欲行安呢！呀你佮伊指示講，愛安怎行則會卡好安呢。有倘時反而來，伊顛倒塊行顛倒卡勿順，顛倒欲跌欲倒。啊人明明就行了好勢好勢，你就佮講安呢安呢卡好勢，安呢的時，伊顛倒怨嘆你，造成對你的誤解。

    所以，人有倘時生存時，愛順其自然去行動，有倘時有會當佮伊轉命，運命轉的時伊無一定轉過，對伊來講，對伊來講是好，因為伊行了習慣啊嘛，行了習慣啦！

    比如講，呀伊就做流浪人，做了習慣啦，你一直欲叫伊定落來，啊定落來的時拵，伊會感覺真傫呀！都講就流浪慣習啊！啊閒閒恬恬一個互做富豪人家，恬恬踮佇遐所在佇遐咧生活啥，啊每工勿當趴趴走，每工簡那踮佇厝內底魚魚肉肉，簡那赫穩定的生活，啊伊就勿恰意安呢！所擺活著顛倒無自然，對嘿壽命亦無卡好。

    呀你卡無自然來過，自然就嘿壽命時就會縮短，這都攏會影響。人該流浪就愛流浪，伊會穩定的人是穩定，呀順其自然伊的個性去發揮、伊的命去行，安呢的時比較卡會出來。

    當你知影這種人，伊的命運是安呢的時，你大約稍佮伊點一下，會使講：「哦！你到佗位劫關去注意一下啥、各方面。」這是可以，這會使。劫關注意了後時，伊的命會當卡長啦乎、卡長啦！起碼伊的身苦病痛卡勿去拄著，這是可以，這會使避關。

    避關並無代表講會當過關，要緊的因為劫是一延一延過，一延運過、換過後延，因為伊攏唯後壁避嘛！唯後壁避，除非你就愛修德來補，則會將這關的時佮伊化開。若講無修德來，伊這個劫嘛是慢慢仔往後一直閃一直閃，到尾仔集集做一大關，你嘛是避勿過。

    普通攏是，咱講關是往後是幫劫，幫劫就是講幫伊轉化，轉化就是講轉到以後的時拵，到以後的時拵哟，了後伊有修德來補，啊補了有夠，這關則避會得過。

    無！雖然報你避，避過、避過，避過來講，伊若無修德來補，後擺積積嘛是一大劫，嘛是走勿去。一大劫的時拵，伊嘛顛倒麻煩哦！所擺你避關避了時，小劫，小劫愛知影去擬時、擬時來做德來補，把這個關來補；補了的時拵了後，伊這關自然正經就避過、避過。

    有的是講，比較關是往後延，延、延了後時，這劫比如講愛受，愛受佮伊講互伊知影一下了後，知影一下伊即嘛把這個劫慢慢仔延、化，化了時伊後擺提德來補，提伊一括德來補，德有夠補了就會運化掉，無形中會當化解。

    若比如講，伊就同款放咧我行我素，呀劫過，劫過就過呀，過伊就無咧睬伊怎樣。哦！我過一個關去啊，哇、啥物人佮我講我會過關啥的有的無的…。若像安呢想、安呢講，就呣對啊！

    伊平常時愛做一括德來補，雖然知影，這天機佮洩漏落，洩漏出去互伊知影，知倘避、避過，但是，愛去提德來補則補會過。無！德若無補，後擺挌加利，挌來連帶利的時拵，顛倒卡食力。

    世間人在這個補運啊、補運中愛修劫運，補運啥，愛去明瞭這個道理啦！你的命運，一生中的災劫災難，攏有一個定數啦！啊補運是安呢，你的運無好來講，欲補可以，欲補可以，但是你愛知影講，這個運補了後時，你愛提一括德、做一括德來補。

    愛做一括德來補了後時，有德則慢慢把你補的運慢慢彌平。小劫當然可以挌再彌平，互彌平並無代表一定攏無代誌，伊是稟報頂高的人，所謂頂高就是一括神呀、土地仔、一括佛呀、佮一括會當辦事有能力的人，去運化去解這個劫。化了的時拵，伊即嘛往後推算來，啊這個稍寄咧，這個小劫稍寄的，後擺則互你做一夥受。

    啊你都有德來補，補了就會當佮你化掉，因為無重要的物件攏會使佮補，都可以。因為，普通一括神佛攏比較慈悲嘛，應該伊辦的代誌伊會當辦，辦啦！這劫互你寄的、寄咧卡慢，卡慢無要緊，寄寄以後德到位，啊都佮伊化掉。

    你若講無，無做德來補，是講啊都補過呀，啥物代誌我就來求神佛就好，拜拜化化就無代誌啊，我就一劫關過了，直接過關了，安呢就無要緊啊。安呢的想法呣對！

    哦！這個代誌愛清楚，愛清楚，將來在辦事中，種種物件有倘時愛緣啦！愛清楚啦！啊天機若稍洩漏無要緊，這種的物件會使洩漏，洩漏那講那講，洩漏出去那講那講，互世間人一個知影，呀有一個醒悟噢。一個醒悟了後則知影講，哟、原來世間雖然是美麗，雖然是可愛，但是宛若愛和樂和善，做德來補，有德來補則會當化這個劫運。

    命欲長壽欲長久的時，亦是愛和善，做德來過日子，則會好過，生活則會卡好卡會自在，劫難則會少，阻礙則會卡少，阻礙會卡少，這都可以去做德來補，都可以以德來補。德、德欲安怎做？德欲做宛若是困難啦！德並無好做。知影講德，德唯佗位來？

    德呣是隨隨便便舉幾枝竹仔來，佮伊囥囥橫橫疊疊就有德哟，呣是安呢的竹。這個德在無形中是安呢，伊本身的時拵，在你每工的想念中，想念中就是平時卡有一括好的想念，想卡好的，卡甭有一括孬的想念。

    所謂好的孬的想念，世間本來形形色色，無好無孬，所謂孬的想念是講，對家己的思想阻礙伊的路，路線阻礙想的卡勿順，想著心肝會艱苦，這呼做德。想著心肝會艱苦了後時，這種就是卡無好的德。

    這種的時，唯你的思想、想念，因為人的思想想念會直達到天，啊無伊會感應感受呀！感受了伊後擺則知影講，這個人凡心卡最，凡心卡勿死，凡心相過最時，你就會影響伊的修性啥，這是卡無形的物件，是屬於一種思想線路的阻礙阻隔。

    這種物件的時，是愛去平常時培養公德心，功利心卡少，公德心卡最了後時，思想的線路阻礙會卡少；但並呣是代表講勿使去趁錢創啥的，呣是！趁錢做生意這無要緊，只要緊你合乎社會的標準道德，這趁錢，永遠都趁落去，永遠都愛去趁，愛去做，佮這無關係，勿去損害著德。

    比如講，這生利的時拵就順事順事，你就合乎你的自然，合乎你的標準落去做，安呢順其自然哦。除非講這落生利，在你這個心內想講欲食人，用心計較、用心機計較啥伙，做了使人無歡喜，使人去食大虧創啥伙，這種就是呼做失德。

    平常時有這種思想行為，啊亦未做亦是可以佮帶過；但是，有思想了後，有決定性開始做，有方法提互別人，思想知影，比如講做一括物件、食品、抑是啥物件，明知對人身體有敗害有啥伙時，啊伊都做一個行為，這亦是無道德的行為，這亦是失德。

    失德中這嘛是阻礙，這就是失德，這就是失德，這種落去就比較卡無好，這德是安呢來的，德是無形中就是安呢做嘛，無形中做。生利人往往咧做攏呣知，簡那唯利是圖，講這次生利做落，啊我這成本就賣一賺百安呢，做一批就好！就無想到講這不應該，都唯生利利益為唯一根本，這就是失德。

    有形的德就是講你處處有機會就去幫助人，去幫助人，有錢無錢攏會使幫助人。生活中言語中，多講一括好話，使人心情快樂；湊陣時盡量快樂的代誌去做；快樂的代誌倘講互人知影時，真快樂湊陣。所擺一般人所講，隱惡揚善啦！隱惡揚善。

    隱惡揚善就是講，把一括無好的物件家己去消化，去消化掉，盡量口頭上就是攏講一括好話，使人心情快樂，卡會歡喜，心境會好。啊自然伊的心境就會向善，向善代誌就做會好，在社會中伊代誌就做會好。這種人造成社會和藹，社會比較卡會和藹，處處看到專好的。

    有的伊嘛是有艱苦的代誌，只是伊本身家己會當自動消化、自動消化。呣是講孬的代誌互別人聽就是無好，呣是安呢！互別人聽時，愛有一個機會乎！比如講，人有欲聽的對象，比如講有欲消化這種的人，像有咧辦事的人，比如講咧救世的人，抑是咧做善的人、先生人啥，這講來互伊聽。

    啊若講有困難，處處攏嘛講這個互聽，講迄個互聽，有的人同款心情嘛勿好！你艱苦講啥足最互人聽，人嘛會艱苦！啊這種人有迄種人倘好消化啊，啊無你本身若會當消化，盡量會當、盡量會當家己消化。

    一片的和藹就是講，快樂的代誌卡最，卡困苦的代誌、困難的代誌，家己有法度消化愛去消化掉。有法度消化，出門去，人就感覺講哦，這人哪會這呢快樂，啊一身攏無艱苦，無啥煩惱安呢！當然大家感受啊講，人都這呢快樂，明明伊家庭就無蓋好額，伊哪會赫呢仔快樂？是啥物道理使伊有法度這呢快樂安呢！會來對伊學習，對伊學習。安呢就造成社會上一片的和藹，社會若加一括這種人，社會會比較會挌卡快樂。

    呣是代表講你艱苦的代誌攏勿使佮人講，勿使計較，欲談的對象愛看款對象，談也可以也可以！比如講卡好的朋友三五個，這攏會使啦！這考慮會當幫你消化嘸！無、講你佮伊講，挌幫你恥笑，安呢顛倒造成你無快樂，啊伊亦無快樂。

    除非你佮伊講了後，伊幫你消化消化掉，啊想辦法幫你消化掉，把這代誌解決掉，安呢是亦會使的，安呢是可以，呣是講安呢勿使，這亦會使幫你消化掉，這代誌有倘解決。若無，簡若你講講伊聽，後擺你挌講，嘛是挌講講伊聽，無佮你消化，等於嘛是無用，變一種的恥笑，並無好處，並無好處。

    在社會中，種種代誌愛去掠角度，掠角度落去做，角度掠互好的時，你做人則會快活，則會快樂。萬項代誌攏會使做，只要緊在你的心理中、心念中無阻礙，無想對不起本身，對不起本身。在社會上，代誌形形色色，好孬真孬分，好歹真難分，只有在認定中，心情好、無去影響著別人，無去阻礙著別人，安呢就是好，安呢就是好。

    咱看這顯景的時哦，蔣中正娶迄陣人乎，伊都佇大陸赫呢風雲，結果來塊落難逃難的時，伊嘛是佮一般的兵同款，一般的兵同款，伊嘛是同款歸陣安呢，同款湊陣行，同款、這擺的時都無分伊身分的高低，同款安呢照安呢行。

    雖然有括人想欲脫離，但是宛若呣敢脫離，就是共同共儕患難、共生死，集體行到這個台灣了後時攏行溝底，恁看攏行溝底，呣敢行唯頂高大路起來，攏循溝底一直行一直行，拄好行到這隱密的所在，拄好你的所在。你講這個所在，你就勿當出去，出去了後就是危險，所擺，閉關的所在就勿使出門，歸陣愛蹛佇遐。所擺伊受困在這個臺灣的所在，這長生島、長生島。

    哦！在蔣中正顯景中來反影足最代誌互恁去體悟，這物件恁慢慢去體悟，體悟伊內底的代誌，因何有這個顯景？娶歸陣人嚇大陣，到尾仔來到來到遮，以為迄拵應該講是無成氣候，但是因何變到尾仔伊會當穩定，穩居在這所在，挌造一個臺灣府。哦！這是為何的道理會變安呢？

    明明看都已經落難無半項，瑃一陣兵無偌最人，已經佇溝底咧走咧逃，因何互伊佇隱遁避關了後，這呢享受這呢久的榮華富貴，在這個台灣所在。這攏是愛體悟的所在，恁愛用心去想，慢慢去想，道理就慢慢出來。

    足最物件，足最問題，都一直顯現出來，顯現出來你就知影，知影做人欲如何做，代誌欲如何行，欲如何用，這攏是愛恁去想的物件哦！慢慢仔去想，萬項代誌愛真用心啦，真用心，用心物件就會出來啦，用心去想就有物件。代誌愛去想、那去想，物件則會出來哦！